Халық денсаулығы және денсаулық сақтау жүйесі туралы кодекске сәйкес Қазақстанның әрбір азаматы тегін медициналық көмектің кепілдік берілген көлемі (ТМККК) шеңберінде дәрілермен және медициналық мақсаттағы бұйымдармен қамтамасыз етуге құқылы. Алайда тегін препараттар ҚР Денсаулық сақтау министрі бұйрығының тізбесінде көрсетілген белгілі бір аурулармен ауыратын науқастарға ғана беріледі.

ТМККК аясында тегін дәрілер алуға кім құқылы?

Келесідей жүрек-қан тамыры ауруларымен диспансерлік есепте тұрған пациенттер мемлекеттік бюджет есебінен дәрілермен қамтамасыз етіледі:

• жүректің ишемиялық ауруы — коронарлық тамырларды стенттеуден, аортокоронарды шунттаудан, миокард инфарктісінен кейінгі науқастар. III-IV ФК кернеуінің стенокардиясы;
• артериялық гипертензия — 2-4 тәуекел дәрежесі; бүйректің созылмалы аурулары кезіндегі симптоматикалық артериялық гипертензия;
• аритмия — жүрекшенің фибрилляциясы (пароксизмалдық, персистикалық, тұрақты), оның ішінде радиожиілік аблациясын (РЖА) орындағаннан кейін;
• созылмалы жүрек жетіспеушілігі — NYHA бойынша II-IV функционалдық сыныптар, оның ішінде дилатациялық кардиомиопатия және артериялық гипертензиямен және жүректің ишемиялық ауруымен байланысты емес созылмалы жүрек жетіспеушілігінің басқа да себептері;
• жүрек қақпақшалары протезделген науқастар — ауырлықтың барлық сатылары мен дәрежелері.

Тегін дәрілер беруге кепілдік берілген аурулардың толық тізбесімен осы жерден танысуға болады. Тізім жыл сайын жаңа препараттармен толықтырылады.

Тегін дәрілер қайда беріледі?

Дәріханаларда және аудандық емханаларда рецепт бойынша, пациенттің жеке басын куәландыратын құжатты көрсеткен жағдайда.

Тегін дәрілерді қалай алуға болады?

Біріншіден, тұрғылықты жері бойынша емханаға тіркелу қажет. Сіздің деректеріңіз Тіркелген халық тізіліміне енгізілуі тиіс.

Содан кейін диспансерлік есепке тұрып, дәрігерлерде: учаскелік терапевтте және бейінді маманда (кардиолог, пульмонолог, эндокринолог және т.б.) бақылауда болу керек.

Егер сіздің сырқатыңыз денсаулық сақтау министрінің № 666 бұйрығымен бекітілген тізімде болса, онда сіз тегін рецепт ала аласыз, оны тек учаскелік дәрігерлер немесе медициналық ұйымдардың бейінді мамандары ғана береді.

Тегін медициналық көмектің кепілдік берілген көлемі шеңберінде қызметтерді жеткізуші болып табылатын емхана жанындағы дәріханада препараттар беріледі. Сонымен қатар өзіңізбен бірге жеке куәлігіңіз болуы керек.

Рецептілерді беру тетігі және олардың ерекшеліктері

• Учаскелік және тар бейінді дәрігерлер диагнозы расталған және анықталған жағдайда тегін дәрілерге рецепт жазып береді.
• Дәрілер диагнозға және дәрігерлік көрсетілімдерге, пациенттің диспансерлік топқа және халықтың белгілі бір санатына жататындығына сәйкес тағайындалады.
• Рецептілер дәрілік заттардың халықаралық патенттелмеген атаулары бойынша қазақ, орыс немесе латын тілдерінде жазылады. Көп компонентті құрамдағы пациенттің жеке төзбеушілігі жағдайында препарат оның сауда атауымен жазылып беріледі.
• Егер фармацевт дәрі-дәрмектерді беруден бас тартса немесе олар үшін төлеуді өтінсе, сіз Қазақстанның Денсаулық сақтау министрлігі жанынан құрылған 1439 жедел желі нөмірі бойынша Дәрілік ақпараттық-талдау орталығына жүгіне аласыз.
• Жазып берілген препараттың мөлшері емдеу курсы есебінен, ал тұрақты (ұзақ) емдеуді қажет ететіндер үшін — үш ай есебінен көрсетіледі.

«Рецептілерді жазып беру, есепке алу және сақтау ережесін бекіту туралы» және «Азаматтарды дәрілік заттармен қамтамасыз ету ережесін бекіту туралы» заңдардың толық мәтінімен келесі жерде және осында танысуға болады.

Сізге тағы не туралы білу керек?

Егер тегін дәрілер алу кезінде қиындықтар туындаса, мысалы, сізден төлем талап етілсе немесе дәрі-дәрмек беруден бас тартса, бас дәрігердің емдеу жұмысы жөніндегі орынбасарына, жергілікті денсаулық сақтау басқармасына немесе Денсаулық сақтау министрлігі Фармация комитетінің департаментіне шағымдануға болады.

Бұдан басқа, Республикалық денсаулық сақтауды дамыту орталығының Дәрілік заттар мен медициналық технологияларды ұтымды пайдалану орталығының жедел желісіне 8 8000 808 887 телефоны арқылы хабарласуға болады (Қазақстан бойынша қоңырау шалу тегін).

Егер дәрілерді алуда іркілістер туындаса, 1439 қысқа нөміріне «СК-Фармация» байланыс орталығына қоңырау шалыңыз. Қалалық және ұялы телефондардан қоңырау шалуға болады, барлық қоңыраулар тегін.